Македонски Зелен Центар

Прва Страна

За нас

Новости

Услуги

Проекти

Документи

Галерија

Линкови

Контакт

Продолжение на Вториот состанок на Парламентарната Зелена Лоби Група

На 7 февруари 2008 година во Собранието на Република Македонија се одржа продолжението на вториот работен состанок на Парламентарната зелена лоби група. На состанокот присуствуваа 8 Пратеници-членови на лоби групата: Благој Зашов, Марјан Додовски, Катерина Димеска, Томе Даневски, Азис Положани, Сафет Незири, Зоран Витанов и Мирјана Секуловска. Состанокот го отвори и водеше г-дин Столе Георгиев, координатор на проектот. На овој состанок присуствуваше и претставник од Министерството за животна средина и просторно планирање, г-ѓа Теодора Обрадовиќ – Грнчаровска.

Пред официјалниот почеток на состанокот, пратеникот Азис Положани имаше процедурална забелешка дека оваа парламентарна лоби група не може да работи ефективно, бидејќи се уште нема избрано Претседавач и притоа, како што рече, сите одлуки што ќе се донесат нема да бидат валидни без потпис на овластено лице. Останатите членови на Парламентарната зелена лоби група се согласија за оваа изјава, по што беше договорено на следниот состанок да бидат избрани Претседавач и Заменик Претседавач.

На овој состанок беше разгледана Резолуцијата на Собранието на Република Македонија за приоритетите за пристапување на Република Македонија во Европска Унија и отворањето преговори за членство во Европската Унија од аспект на животната средина. Исто така на овој состанок се разгледа и усвоениот Стратешки план на Министерството за животна средина за периодот од 2008 – 2010 година. Пратениците се јавија за дискусија по оваа точка при што беше истакнато дека буџетот за спроведување на проекти од областа на животната средина е мал и оти треба во иднина да се размислува за издвојување повеќе средства за екологијата, бидејќи инвестициите во животната средина се едни од најскапите. Исто така треба да се подигне јавната свест кај граѓаните за животната средина, бидејќи Македонија заостанува во однос на регионот по ова прашање.

Претставникот од Министерството за животна средина и просторно планирање, истакна дека е ова министерство е првото министерство кое е ставено на скрининг од Брисел и Министерството е обврзано секоја година да доставува документи за напредок во областа на животната средина.
Последна точка на дневен ред беше точка разно под која се разговараше за:

Состанок со претставници на 10 невладини организации и Парламентарната зелена лоби група, кој треба да се одржи кон крајот на месец февруари;
Иницијатива за пошумување „Ден на дрвото“, за која веќе беа запознати на претходниот состанок и пројавија голем интерес за поактивно вклучување во истата;
Промовирање на Парламентарната зелена лоби група на www.zeleni.org.mk, при што беше договорено да се стават слики и биографии од членовите на лоби групата.